Hola neños, neñes, non tan neños, non tan neñes… y a tolos que vos presta pasar perequí. Soi’l gatu Comellingua… ¿Qué quién ye’l gatu Comellingua?… Paezme a mi que si enxamás sentistis falar de mio ye que sois mui faladores porque… ¿Nunca vos dixeron eso de “paez que te comió la llingua un gatu”?. Pos bien, yo soi esi gatu.

Enxamás comí nenguna llingua, préstenme más los pexes o la lleche como a tolos gatos pero, nuna ocasión, a una vecina “pergraciosa” ocurrióse-y dicir que´l so neñu nun falaba porque-y comiere yo la llingua.  Y la que se montó: los vecinos pensaron que yera verdá y echáronme del barriu y, pa encima, el neñu nun dexó de falar pa demostra-yos que tenía llingua (nun calla nin pela nueche). Total: tuvi que dime pa otru llugar y entamar una nueva vida.

Nuna de les mios guetes d’un llugar nuevu pa vivir, sentí falar a unos neños nuna llingua mui prestosa: entrugué-yos y dixéronme que yera la llingua asturiana, la que se fala n’Asturies. Gustóme tanto que quixi entamar a falar nella (sí, los gatos tamién miagamos n’otres llingües).  Dixéronme que podía deprendela en munchos de los colexos d’Asturies.

Asina qu’equí toi nesti colexu con tolos neños y neñes que quieren deprender asturianu y que faen munches y prestoses coses.

¡Ah!, escaecíaseme una cosa… ¿Por qué toi nel colexu San Félix si hai más colexos onde deprender asturianu?: porque vi na tele (sí, los gatos tamién vemos la tele) que nesti colexu había un montón de mures y nun se qué de les TIC… La verdá que nun yeren los animales qu’esperaba atopar, estos nun cuerren muncho y tienen un rabu perllargu xuníu a un ordenador…  Pero alcuéntrome perbién y mui agusto viviendo nun rinconín de la clas de llingua dende onde puedo contavos, xunto colos mios nuevos vecinos los escolinos de Llingua Asturiana del colexu San Félix, toles coses que facemos pa deprender esta preciosa llingua, la nuesa Llingua Asturiana.